სიახლეები

საქართველოს ნოტარიუსთა პალატა აგრძელებს აქციას: „სამართლებრივი რჩევები უფასოდ“, ამჯერად მუნიციპალიტეტების მოსახლეობისთვის. შეხვედრები საზოგადოებრივ ცენტრებში გაიმართება.

პირველი აქცია დღეს მუხაესტატეს  საზოგადოებრივ ცენტრში (ქობულეთის რაიონი) ჩატარდა.

ნოტარიუსთა პალატის წევრთა რიგგარეშე კრებაზე გამგების სამი წევრიც აირჩიეს.

ნოტარიუსთა პალატის გამგეობა თავმჯდომარის, თავმჯდომარის მოადგილისა და  5 წევრისგან შედგება. 17 ივნისს ნოტარიუსებმა გამგეობის თავმჯდომარე, მოადგილე და ორი წევრი აირჩიეს. ნოტარიუსთა პალატის საერთო კრება  გამგეობას 3 წლის ვადით ირჩევს. საქართველოს ნოტარიუსთა პალატას სამი წლის განმავლობაში გამგეობის თავმჯდომარე მარიკა გოგოლაძე, თავმჯდომარის მოადგილე თინათინ დევდარიანი და წევრები: ხათუნა კალანდარიშვილი, მანანა გოგაშვილი, მეგი მაღალდაძე, გიორგი ჭიტაშვილი და მერაბ ფარჯიკია უხელმძღვანელებენ.

საქართველოს ნოტარიუსთა პალატისა და ბანკების წარმომადგებს შორის მორიგი შეხვედრაც შეთანხმებით დასრულდა. ბანკები მზად არიან, ნოტარიუსებისთვის გაიხსნას ნომინალური მფლობელობის ანგარიშები, რაც იმას ნიშნავს, რომ ნოტარიუსის სადეპოზიტო ანგარიშის დაყადაღების შემთხვევაში, მოქალაქის მიერ დეპოზიტზე შენახულ თანხას ყადაღა ან ინკასო არ შეეხება. ეს კი მოქალაქეთა ქონების დაცვის დამატებითი გარანტიაა.

იუსტიციის მინისტრის ინიციატივით, ნოტარიუსთა პალატას მეორედ მიეცა თავმჯდომარის დამოუკიდებლად არჩევის შესაძლებლობა. მიუხედავად იმისა, რომ  „ნოტარიატის შესახებ“ კანონი თავმჯდომარის კანდიდატურის შერჩევისა და ნოტარიუსთა საერთო კრებისათვის მისი წარდგენის ერთპიროვნულ უფლებას იუსტიციის მინისტრს აძლევს, ისევე, როგორც 2014 წელს, თეა წულუკიანმა უარი თქვა კანდიდატურის ერთპიროვნულად დასახელებაზე და შესაძლებლობა მისცა ნოტარიუსებს, გამგეობის თავმჯდომარე დამოუკიდებლად აერჩიათ. ელექტრონული პრაიმერისის შედეგად პალატის თავმჯდომარის პოსტზე ნოტარიუსებმა მარიკა გოგოლაძის კანდიდატურას მიანიჭეს უპირატესობა. სწორედ ის წარუდგინა კრებას დასამტკიცებლად იუსტიციის მინისტრმა. 

საკუთარი  კანდიდატურის წამოყენება ყველა ნოტარიუსს შეეძლო, ვინც უწყების განვითარების საკუთარ ხედვას წარადგენდა და კოლეგების მხარდაჭერის მოპოვებას შეძლებდა. თავმჯდომარეობის სურვილი 7-მა კანდიდატმა გამოთქვა. მათგან  საუკეთესო ნოტარიუსებმა ხმის მიცემის ელექტრონული სისტემით გამოავლინეს, რომელიც  სსიპ „მონაცემთა გაცვლის სააგენტომ“  სპეციალურად ნოტარიუსთა პალატის თავმჯდომარის არჩევნებისათვის შეიმუშავა. 

საერთო კრებაზე ნოტარიუსებმა თავმჯდომარის მოადგილე და გამგეობის წევრებიც აირჩიეს. თავმჯდომარის მოადგილის პოსტი თინათინ დევდარიანმა დაიკავა, გამგეობის 5 წევრიდან დღეს მხოლოდ ორი − გიორგი ჭიტაშვილი და მანანა გოგაშვილი − აირჩიეს, ვაკანტურად დარჩენილ სამ ადგილზე 2 კვირაში განმეორებითი არჩევნები გაიმართება.

თავმჯდომარის ელექტრონული არჩევნების გარდა, ნოტარიუსთა პალატაში იუსტიციის  მინისტრის მიერ ინიცირებული რეფორმის ფარგლებში კიდევ არაერთი ცვლილება გატარდა, კერძოდ:

• ამოქმედდა დავის მოგვარების ალტერნატიული და თანამედროვე გზა − სანოტარო მედიაცია;
• შეიქმნა სასამართლოს მიერ მხარდაჭერის მიმღებად აღიარებულ პირთა მუდმივად განახლებადი ელექტრონული ბაზა; დაინერგა სერვისი „ონლაინ კონსულტაცია ნოტარიუსთან“;
• განხორციელდა ნოტარიუსთა პალატის რებრენდინგი, დაიწყო სარეკლამო კამპანია „მე ვენდობი ნოტარიუსს“;
• დაიწყო სანოტარო მომსახურება საზოგადოებრივ ცენტრებში სოფლად;
• ყოველი ახალდანიშნული ნოტარიუსი ვალდებული გახდა, პირველი 3 წელი იმსახუროს მთიან ან ისეთ რეგიონში, სადაც სანოტარო მომსახურება სათანადოდ ხელმისაწვდომი არ არის. რეფორმების შედეგად სანოტარო მომსახურება გაჩნდა იქ, სადაც არასოდეს ან ხანგრძლივი პერიოდის განმავლობაში არ არსებობდა;
• სანოტარო მომსახურების გასაუმჯობესებლად სანოტარო ბიუროებში მოქალაქეთა მომსახურების მონიტორინგისთვის „მისტიური მომხმარებლის“ პროგრამა დაიწყო;

მედიატორ  ნოტარიუსებს, კვალიფიკაციის ამაღლების მიზნით, სწავლება ჩაუტარდათ. სემინარი ახლად დანიშნულმა ნოტარიუსებმაც გაიარეს.

სწავლება საქართველოს ნოტარიუსთა პალატის სასწავლო ცენტრისა და  ევროკავშირის პროექტის „კერძო და ადმინისტრაციული სამართლის სისტემების ხელშეწყობა საქართველოში“ ორგანიზებით ჩატარდა.