ნოტარიუსთა პალატა აქციაში „შეხვედრა ხალხთან“ ჩაერთო

საქართველოს ნოტარიუსთა პალატამ, იუსტიციის სამინისტროსა და სამინისტროში შემავალ ყველა სამსახურთან  (საჯარო რეესტრის ეროვნული სააგენტო, სამოქალაქო რეესტრის სააგენტო, აღსრულების ეროვნული ბიურო, ეროვნული არქივი, იუსტიციის სასწავლო ცენტრი) ერთად, აქცია “ შეხვედრა ხალხთან“ დაიწყო. აღნიშნული აქცია მთელი საქართველოს მასშტაბით ტარდება და მოსახლეობისთვის იუსტიციის სამინისტროსა და მასში შემავალი სამსახურების საქმიანობის, მათ მომსახურებაში დანერგილი სიახლეების გაცნობას ითვალისწინებს.
პირველი შეხვედრა კახეთის რეგიონში, თელავსა და გურჯაანში ჩატარდა. აქციის მონაწილეებმა მოსახლეობას საკუთარი უწყებების სერვისების შესახებ დაბეჭდილი საინფორმაციო ბუკლეტები,  ჟურნალები და ფლაერები დაურიგეს და სამართლებრივი კონსულტაციაც გაუწიეს.
მოსახლეობის განსაკუთრებული დაინტერესება გამოიწვია მოქალაქეთა მომსახურებაში დანერგილმა სიახლეებმა, რაც აღნიშნული უწყებების  სერვისებს უფრო გამარტივებულს, ხარისხიანსა  და ეფექტურს ხდის.
აქცია „შეხვედრა ხალხთან“ საქართველოს სხვა და სხვა რეგიონში სისტემატურად ჩატარდება.