საქართველოს ნოტარიუსთა პალატამ ნოტარიუსთა საერთაშორისო კონგრესს ქართული ნოტარიატის მიღწევები გააცნო

საქართველოს ნოტარიუსთა პალატის დელეგაციამ,  ლათინური  ნოტარიატის საერთაშორისო კავშირის ეგიდით, მაროკოში გამართულ ნოტარიუსთა 26-ე საერთაშორისო კონგრესში მიიღო მონაწილეობა.  შეხვედრის თემები იყო: ლათინური  ნოტარიატის საერთაშორისო კავშირის წევრი ქვეყნების ნოტარიატების მდგომარეობა და მათი მიღწევები, ამასთან, სანოტარო აქტების სააღსრულებო ძალა, ნოტარიატის როლი კრიზისების პრევენციაში, საჯარო რეესტრებთან ურთიერთობა, ფინანსური მონიტორინგი, უკანონო შემოსავლების წინააღმდეგ ბრძოლა...
განხილულ თემებთან დაკავშირებით, კონგრესზე მიიღეს რეზოლუციები, რომელსაც დამატებით განვათავსებთ ვებგვერდზე.
 საქართველოს ნოტარიუსთა პალატის თავმჯდომარემ ნინო ხოფერიამ და პალატის გამგეობის წევრმა დავით ოყროშიძემ კონგრესზე ისაუბრეს ქართულ ნოტარიატში დანერგილ სიახლეებსა და მიღწევებზე. მოხსენებაში ყურადღება გამახვილდა საკანონმდებლო სიახლეებზე, რამაც მოქალაქეთა მომსახურების გამარტივებას შეუწყო ხელი. ქართული სანოტარო კანონმდებლობაში დანერგილმა სიახლეებმა კონგრესის დამსწრეთა დიდი ინტერესი გამოიწვია.
საქართველოს ნოტარიატი ლათინური ნოტარიატის საერთაშორისო კავშირში 2007 წლის 26 ოქტომბერს გაერთიანდა. კავშირი ერთხმად აღიარებს საქართველოს ნოტარიუსთა პალატას, როგორც საქართველოს ნოტარიატის უმაღლეს წარმომადგენლობას და მას ამ კავშირის წევრებისთვის დადგენილ უფლებასა და პრივილეგიას ანიჭებს.