გაიარე სტაჟირება და გახდი ნოტარიუსი - ნოტარიუსთა პალატამ სტაჟირების გამოცხადების პარალელურად საუნივერსიტეტო შეხვედრები დაიწყო

„გაიარე სტაჟირება და გახდი ნოტარიუსი“ - ნოტარიუსთა პალატამ სტაჟირების გამოცხადების პარალელურად საუნივერსიტეტო შეხვედრები დაიწყო. შეხვედრების მიზანია, რაც შეიძლება მეტმა ახალგაზრდამ გაიგოს სტაჟირების კონკურსის შესახებ, რომელიც 9 ნოემბერს გამოცხადდა. სტაჟირება ნოტარიუსად გახდომის ერთ-ერთი აუცილებელი პირობაა. სხვაგვარად სანოტარო სისტემაში დასაქმება შეუძლებელია. ამ პროფესიით დაინტერესებულ პირებს ყოველთვის არ ეძლევათ სტაჟირების გავლის და, შესაბამისად, ნოტარიუსის პროფესიის დაუფლების საშუალება.

ახალგაზრდა ნოტარიუსები, რომლებმაც ცოტა ხნის წინ გაიარეს სტაჟირება, ჩააბარეს საკვალიფიკაციო გამოცდა და დღეს პროფესიულ საქმიანობას ეწევიან, სტუდენტებს, რომლებსაც სურთ გახდნენ ნოტარიუსები, ურჩევენ, მიიღონ მონაწილეობა მიმდინარე კონკურსში და გადადგან პირველი ნაბიჯი სასურველი პროფესიისაკენ.

პირველი ასეთი შეხვედრა დღეს კავკასიის უნივერსიტეტში გაიმართა. ნოტარიუსმა ცირა ლომაიამ სტუდენტებს სტაჟირების პროგრამა და კონკურსის პირობები გააცნო და ნოტარიუსის პროფესიის შესახებ ესაუბრა, ღონისძიების ბოლოს კი მათ კითხვებსაც უპასუხა. იურდიული ფაკულტეტის მაგისტრანტებს, რომელთაც აინტერესებთ ნოტარიუსის პროფესია ან ჯერ არ გაუკეთებიათ პროფესიული არჩევანი, შესაძლებლობა ჰქონდათ, ამომწურავი ინფორმაცია მიეღოთ სანოტარო სისტემის და საქმიანობის შესახებ, რაც მათ ინფორმირებული არჩევანის გაკეთებაში დაეხმარებათ, ნოტარიუსთა პალატას კი საშუალებას მისცემს, რაც შეიძლება მეტი პერსპექტიული და მოტივირებული კადრი მოიზიდოს სანოტარო სისტემაში.

საუნივერსიტეტო შეხვედრები თბილისსა და რეგიონებში სტაჟიორთა კონკურსის მიმდინარეობის პერიოდში რეგულარულად გაიმართება.

 სტაჟიორთა კონკურსი ნოტარიუსთა პალატამ 2019 წლის 9 ნოემბრიდან გამოაცხადა და ის 5 დეკემბრამდე გასტანს. სტაჟირების პროგრამის თანახმად იურისტებს, რომელთაც სურთ დაეუფლონ ნოტარიუსის პროფესიას, ნოტარიუსთა პალატაში შესაძლებლობა აქვთ გაიარონ სტაჟირების სრული კურსი, რომელიც მოიცავს 10 თვეს. აქედან 5 თვე კი ეთმობა სანოტარო პრაქტიკას. პროფესიულ პრაქტიკას მომავალი ნოტარიუსები სანოტარო ბიუროებსა და სხვადასხვა საჯარო უწყებებში გაივლიან. დეტალური ინფორმაცია ნოტარიუსის პროფესიით დაინტერესებულ პირებს შეუძლიათ იხილონ ნოტარიუსთა პალატის და იუსტიციის სასწავლო ცენტრის ოფიციალურ ვებგვერდებზე.